ಹಣ ಸಂಪಾದನೆ ಯಾರಿಗೆ ಬೇಡ? ಈಗಿನ ಯುಗದಲ್ಲಿ ಎಲ್ಲರೂ ಹಣದ ಹಿಂದೆ ಓಡುವವರೇ, ಆದರೆ ನಿಮಗೆ ಗೊತ್ತೇ? ಸಮಯವನ್ನು ಸರಿಯಾಗಿ ನಿಭಾಯಿಸುವವನು ಅತ್ಯಂತ ಶ್ರೀಮಂತ ವ್ಯಕ್ತಿ. ಏಕೆಂದರೆ ಸಮಯದ ಬೆಲೆ ಅರಿತವನಿಗೆ ಹಣ ಸಂಪಾದನೆ ದೊಡ್ದ ಸಂಗತಿಯಾಗಿರುವುದಿಲ್ಲ. ಏಕೆಂದರೆ ಆತನಿಗೆ ಸಮಯವೇ ಅತ್ಯಂತ ದೊಡ್ದ ಹಣ. ಈ ಬಗ್ಗೆ ಸೊಗಸಾದ ಪುಸ್ತಕ ಬರೆದಿದ್ದಾರೆ ಸತ್ಯೇಶ್ ಎನ್ ಬೆಳ್ಳೂರ್.  “ನಿಮಗೆಲ್ಲ ಹಣ ಮಾಡಬೇಕು ಎಂಬ ಬಯಕೆ ಇದೆಯೆ? ಹಾಗಿದ್ದರೆ, ನೀವೆಲ್ಲ ಸಮಯವನ್ನು ಗೌರವಿಸುತ್ತ ಅದನ್ನು ಪಾಲಿಸಿದರೆ ಸಾಕು. ಏನಿದು? ಸಮಯಕ್ಕೂ ಹಣಕ್ಕೂ ಅದ್ಯಾವ ನಂಟು ಎಂದಿರಾ? ಹಾಗಿದ್ದರೆ, ಈ ಕೃತಿ ನಿಮಗೆ... ಜೀವನದಲ್ಲಿ ಯಶಸ್ಸನ್ನು, ಅಪಾರ ಹಣವನ್ನು ಕಂಡಿರುವ ಯಾವುದೇ ಸಾಧಕರನ್ನು ನೋಡಿ. ಅವರೆಲ್ಲರೂ ಸಮಯದ ಪರಿಪಾಲನೆಯಲ್ಲಿ ಯಾವುದೇ ರಾಜಿ ಮಾಡಿಕೊಂಡವರಲ್ಲ. ಅವರೆಲ್ಲರ ಯಶಸ್ಸಿನ ಹಿಂದೆ ಕಂಡೂ ಕಾಣದಂತೆ ಇರುವ ಅವರ ವ್ಯಕ್ತಿತ್ವದ ಗುಣವಿಶೇಷವೇ ಅವರಿಗೆ ಸಮಯದ ಬಗ್ಗೆ ಇರುವ ಅಪಾರ ಕಾಳಜಿ ಎಂದು ನಿಮಗನ್ನಿಸದ್ದರೆ, ಈ ಕೃತಿ ನಿಮಗೆ... ಹಣ ಹೋದರೆ ಮತ್ತೆ ಹಣ ಗಳಿಸಬಹುದು. ಸಮಯ ಮಿಂಚಿದರೆ ಅದನ್ನು ಮತ್ತೆ ಪಡೆಯಲು ಸಾಧ್ಯವೇ ಇಲ್ಲ ಎಂಬ ಸರಳವಾದ ಜೀವನ್ಮೌಲ್ಯದ ಬಗ್ಗೆ ನಿಮಗೆ ನಂಬಿಕೆ ಇದ್ದರೆ, ಈ ಕೃತಿ ನಿಮಗೆ... ಸಮಯದ ಮಹತ್ವವೇನು? ಸಮಯದ ನಿರ್ವಹಣೆ ಹೇಗೆ ಸಾಧ್ಯ? ಸಮಯವನ್ನು ಸಾಧನೆಯ ಪಥದಲ್ಲಿ ಬಳಸಿಕೊಳ್ಳುವುದು ಹೇಗೆ? ಸಮಯದ ಪರಿಪಾಲನೆಯಲ್ಲಿ ನಮಗೆ ನೆರವಾಗಬಲ್ಲ ಸರಳವಾದ ವಿಧಿವಿಧಾನಗಳು ಯಾವುವು? ಎಂಬಿತ್ಯಾದಿ ಪ್ರಶ್ನೆಗಳು ನಿಮ್ಮನ್ನು ಕಾಡುತ್ತದ್ದರೆ, ಈ ಕೃತಿ ನಿಮಗೆ... ಈ ಕೃತಿಯಲ್ಲಿ ಸಮಯದ ಪರಿಪಾಲನೆಗಾಗಿ ಇರುವ ಸುಲಭವಾದ ಕ್ರಮವನ್ನು ನೀವು ಅರ್ಥ ಮಾಡಿಕೊಂಡು ಅದನ್ನು ನಿಮ್ಮ ಜೀವನದಲ್ಲಿ ತಂದುಕೊಂಡರೆ, ನಿಮ್ಮ ಬದುಕಿನಲ್ಲಿ ಯಶಸ್ಸು ಖಂಡಿತ. ಅಂದಹಾಗೆ, ತನ್ಮೂಲಕ ಹಣವನ್ನೂ ಗಳಿಸುತ್ತೀರಿ ಎಂಬುದರಲ್ಲಿಯಂತೂ ಎಳ್ಳಷ್ಟೂ ಸಂಶಯ ಬೇಡ. ಏಕೆಂದರೆ, ಸಮಯ = ಹಣ…”  ಈ ಮಾತುಗಳು ಕಂಡು ಬಂದದ್ದು ಸಮಯ = ಹಣ ಕೃತಿಯ ಬೆನ್ನುಡಿಯಲ್ಲಿ. ೧೧೬ ಪುಟಗಳ ಈ ಕೃತಿ ನಿಮ್ಮ ಉತ್ತಮ ಓದಿಗೆ ಸಹಕಾರಿಯಾಗಬಹುದು.